Diadomingo atardi tabata tin continuacion di play off final di divicion Junioren di A.V.B. unda cu pa 6'or di atardi Dakota a enfrenta Britannia. E wega tabata un wega bastante balansa unda cu ambos equipo a hanja oportunidadnan pa score den comienso di wega pero no tabata sa di probecha. Den e aliñacion di Britannia nos a hanja falta di Derwin Donato,  Sebastian Montoya y Gerald Moreta. Nos por a comprende cu Derwin lo ta biahando pa Colombia mientras cu Sebastian a hasi un operacion chikito y Gerald a biaha cu seleccion. Den e team di Dakota tambe tabata falta algun hundador cu tambe a biaha cu seleccion di Aruba. Den di dos tempo Dakota a bai ariba cu dos gol anota pa medio di; Marc Milrose despues di un bruhamento entre keeper y defensa y di dos gol a wordo anota pa Markwin Ignacio. Ora cu tur hende a kere cu Dakota ta bai gana e wega, Britannia a demostra corage y determinacion y ta score pa medio di Ferney Castaño y Chivaro Lo-Fo-Sang y ta logra un empate importantisimo. Britannia Junioren su proximo wega ta diaranson 21 juli pa 6'or di atardi Britannia vs Estrella y pa 8'or Dakota vs Nacional.