Mc Donald’s sponsor oficial di FIFA World cup 2010 ta anuncia diaranzon 17 di februari den “Technical Center Angel Botta” en co-operacion cu Arubaanse Voetbal Bond un tremendo campaña caminda un di nos muchanan lo por participa na Mundial 2010. Di parti di Mc Donald’s tawata presente sr. Jonkheer y sra. Pereirra, tambe tawata presente sr. Jimmy Richardson como un di nos baluartenan den futbol cu lo fungi como un di e huradonan pa e campaña aki. Na mesa hunto cu nan a tuma lugar sr. Rufo Kelly  cu a representa Arubaanse Voetbal Bond, tambe varios otro miembronan di directiva a haci acto di presencia. Un danki tambe pa nos futbolistanan joven cu a bin presencia e anuncio di e camapaña aki di Mc Donald’s cu sigur lo ta un sonjo cu por bira realidad y sin duda e lo ta un experiencia unico cu sigur e mucha afortuna lo goza un mundo.   “Player Escort Program” ta un campaña na unda Mc Donald’s lo manda mas di 1400 mucha di varios país pa FIFA su Copa Mundial 2010 na Sur Afrika.Di Aruba of Curaçao un mucha lo hañá e oportunidad di viaha pa Sur Africa y subi tereno di wega cu un hungador na comienso di e wega. E premio cu ta pa un mucha y un mayor/representante ta inclui pasashi ida y vuelta pa Johannesburg, Sur Africa,  estadia, cuminda, transporte pa; aeropuerto, hotel y stadion, tambe lo tin un tour di Johannesburg inclui den e pakete. Pa participa ta masha facil. Un mucha entre 6 y 10 aña por pasa na un di nos restaurantnan na Palm Beach of Santa Cruz y busca un formulario. Riba e formulario mester yena tur informacion. Ariba e mes un formulario tin espacio pa haci un pintura. E pintura mester ta un pintura cu ta mustra e participante su passion pa futbol den e esfera di FIFA su Copa Mundial 2010. Ta masha importante cu tur informacion mester wordu yena riba e formulario. E formulario aki mester wordu deposita den un buson special cu lo tin na e Mc Donald’s nan na Palm Beach y Santa Cruz prome cu 6’or di atardi diasabra 20 di Maart, 2010. Despues di e fecha ey un hurado cu representantenan di Aruba y Curaçao, cu ta inclui entre otro un artista, miembro di prensa, personahenan di futbol,  lo saca e 4 miho pinturanan di cual lo saca un solo  ganador. Lo anuncia e ganador diaranzon 31 di Maart,2010.    Ta importante cu tur hende ku kier participa ta sigur cu: ·         E  participante y su compañero tin un Paspoort valido·         Cu e muchanan cu ta participa ta entre 6 y 10 aña di edad. E mucha cu tin 10 aña di edad no tin mag di cumpli 11 aña prome cu 26 di juni, 2010·         Cu e mucha y su compañero por viaha dia 22 di Juni y regresa dia 27 di Juni, 2010·         Cu a lesa tur e reglanan ariba e formulario·         Cu e mucha no ta famia di un empleado of compania di publicidad di Mc Donald’s. Esey ta inclui mama, tata, yui, ruman, primu/a, subrino/a, wela, tanta, of omo. ·         E premio aki naturalmente no por wordu transferí of cambia pa placa cash.·         Tur informacion ta yena riba e formulario E ultimo punto ta masha importante pasobra si e formulario no ta completamente yena, e ta wordu descualifica. Si pa cualkier motibo e ganador no por viaha naturalmente e prome finalista lo haña oportunidad di tuma su lugar. Arubaanse Voetbal Bond kier a agradeci Mc Donald’s cu a sa di deposita su confianza den e organo mas halto den futbol aki na Aruba y sigur lo trata di sigui traha den un esfera di respet mutuo pa conhuntamente nos yega na proyectonan cu lo beneficia ambos partido y en especialmente nos deporte rey futbol. Por ultimo Mc Donald’s kier a desea tur mucha suerte y cu nan por goza di e pintamento.