E equipo di Deportivo Nacional dirigi pa Don Silo Brete a bolbe sorprende un di e punteronan di e campeonato actual, awor ta e savaneteronan di La Fama ta esnan cu a ser derota anto convincente cu e score di 2 - 0.

Di otro banda mester bisa cu La Fama no ta bayendo bon, despues cu entrenador Epi Albertus a bai Hulanda, La Fama no a conoce e palabra victoria, nan a perde den final di Copa Betico, despues empata cu Britannia den e prome wega di e di dos buelta y awor ta perde dos wega sigui contra di Estrella y awor Deportivo Nacional. Ta parce cu e equipo a perde streya di nort, anto pio ainda cu portero Jeffrey Werleman y Fransel de Cuba geschors, wardando nan caso bini padilanti. 

Mester bisa cu e golnan a bini di Albert Geerman y Jeamir Brokke. Den e prome tempo, Chencho Gonzales ta cobra un tiro liber na banda drechi di e tereno y aki Albert Geerman ta pone pia na e bala y ta pone den net pa e 1 - 0. Den e di dos tempo, Theric Ruiz ta cobra un free kick di mas di 30 meter, caminda portero Ras no por a wanta esaki cu dos man y aki Jeamir Howell Brokke inteligentemente ta sigui e hugada y ta rebota e bala pa e 2 - 0 pa Deportivo Nacional. Cu e victoria aki Deportivo Nacional ta bai 20 punto y ta pasa Bubali ariba e tabla di posicion y posiciona su mes na di cuater lugar, mientras cu La Fama ta keda na di tercer lugar cu 21 punto.