Den un wega cu mester lubida mas liher cu ta posibel, e equipo di R.C.A. y Britannia ta bin empata 0-0 den un wega sumamente slordig, mas ainda di banda di Britannia. Den un stadion Guillermo Trinidad  bastante yena cu fanatico. 

E e number uno y dos di e campeonato actual esta Britannia y RCA. E equipo di Piedra Plat kendenan den e prome ronda a sa na perde di RCA y tabatin un 'appeltje te schillen' cu e tricolornan di Solito pa cu e wega aki. Un victoria pa Britannia, lo nifica cu nan lo ta fuerte para pa loke ta na vispera pa un playoffnan final, mientras un victoria pa RCA lo haci nan e lidernan di un biaha mas di campeonato actual.

Ambos equipo a subi cu un alineacion fuerte, pero cu Britannia faltando varios estelar: manera Marlon Andrea, Giovanni Thode y Mark Mackay. Pues cu intencionnan serio pa hiba cas e tres puntonan. Den e prome tempo nos por a mira dos equipo cu hopi respet pa otro, ambos poco poco tabata purba nan lansa nan atakenan ariba gol, usando nan aleronan veloz. Den e medio campo nos por a mira hopi movecion cu marcacion fuerte ariba otro, tur cos a mustra cu e equiponan a buska na domina esaki pa despues arma nan atakenan. Britannia a cuminsa domina despues di algun minut, pero nan tabata mas stabil y a yega e gol di RCA hopi mas facil. Di otro banda RCA a perde den e hungador Mayora kende a keda lesiona y mester a bandona e partido despues di un infraccion fuerte di Gio,  na su lugar a drenta Raymbert Bikker. Mester bisa cu despues di e cambio aki, RCA a bira hopi mas stabil, cu un Ale Aparicio den medio campo, nan a haya algun oportunidad clave. Na di 18min Javier Schoop ta tira duro, pero ta mira su bala pasa ariba e gol bai, ni un minut  despues e equipo di Britannia pa medio di Chando ta lora bon dilanti gol pero portero Maestro ta intercepta. Mas y mas e wega sigui su curso Britannia a tuma e inicativa di e partido over, na di 30minut,e delantero di Britannia Jonathan Lake ta tira cu su pia robez, pero portero Maestro ta luci y pomp esaki manda pafor. RCA despues di basta rato ta haci un atake, na di 39min Eric Santos ta los un tiro di 25 meter, pero David Lacle ta para esaki facilmente. Sinembargo RCA ta haya e mihor oportunidad ora cu na di 44min un bon contra atake ehecuta pa e alero Rua ta wordo full desperdicia pa Schoop kende ta tarda un mundo pa tira ariba gol. Mucho mas no a pasa den e prome tempo.

Segundo tempo Apenas dos minut, Jonathan Lake ta haya un bon oportunidad pero su bala ta pasa rasca e palo di gol bai afor. Na 51 y 53 minut, e hungador Rua ta haya dos oportunidad clave pero ta disperdicia ambos, prome e ta tira duro pero su bala ta mucho halto, e di dos e ta pasa e bala envez di tira ariba gol. Na 56min, Javier Schoop, ta los un canonazo na unda e bala ta dal den palo pasa patras di e portero y bai afor. Tres minut despues Rua ta haya su di tres oportunidad pa anota pero atrobe no por concretisa cu un bala mal tira ariba gol. Mester bisa cu e wega a bira uno fuerte caminda e emocionnan a bira halto, hungadornan constantemente tabata mete cu e referee pa cada hugada cu pasa ariba e tereno di bala, esaki sigur ta algo iritante. Dado momento, hasta e banki a cuminsa mete cu e arbitro na esaki na su turo a saca entrenador Willy Croes di Britannia for di tereno despues cu Willy tabata sinta pa rato largo y no tabata duna instruccion na su equipo. Ta bon pa menciona cu e referee Eugene Farro tabata mucho pasivo den e partido, den bez en cuando e tabata duda den e hugadanan y tabata depende hopi den su jueznan di linja, nos ta kere ora cu e partido cuminsa bira cayente, bo mester ta cerca di cada hugada y pita di biaha.

Na di 70minut, e alero Chando de Lange ta los bon for di su hungador y ta tira duro pero su bala ta pasa na banda. Den e ultimo minut di e partido, parce cu Britannia a haya un penalty bisto, den e hugada aki, Chando ta ser faulia dor di Raymbert Bikker den e area penal, pero referee Farro no ta fluit, e no tabata ariba e hugada, pero e linesman Angela tampoco no a flag e hugada, mester bisa cu e hungadornan di Britannia a rabia pisa pa e hecho aki. Mucho mas no a pasa den e wega aki, e partido ta termina 0 - 0, un wega cu ambos equipo ta colecciona un punto na unda Britannia ta keda na cabez cu 23 punto y RCA ta bai na 22 punto. Remarcabel ta cu na final tabatin hopi discusion na unda dirgentenan tabata discuti cu referee, algo cu no ta netjes, nos ta compronde cu e emocionnan ta halto, pero discuti no lo cambia nada, ta pio cos ta bira. Pafor di stadion mes, e tension tabata un tiki halto, asistencia di polis a ser pidi, pero ya ban spera pa cosnan bai mihor un proximo bez.