Diasabra anochi net prome cu e clash entre RCA y Britannia, e equipo di Angochi esta Sportboys ta enfrenta y muchanan di Madiki-Playa Pabou esta Riverplate. Un wega tog pa Riverplate di suma importancia mirando cu un victoria lo saca nan for di den sotano y un Sportboys kende lo bai na 15 punto cu un victoria y lo sigura nan posicion y existencia den futbol Division di Honor.

E wega ta cuminsa yen speed un Riverplate cu a bini dicidi pa gana e wega aki ta bai ariba 1-0 cu gol anota ya na di 2min pa e hoben Alberto Grovell. Mas e wega a sigui su curso ambos equipo a haya oportunidad di anota gol, pero ningun di dos no ta logra. Den e segundo tempo Sportboys ta sali brabo, na unda nan ta crea algun bon chens di empata e partido. Mester bisa cu un fayo grandi di e portero di Riverplate ta pone Sportboys empata e partido 1 - 1, ora cu e bala ta slip for di su man y cai ariba pia di Roderick Croes kende sin pordon ta pone e bala den net, esaki na di 67 min.

Dos minut despues tabata e number 6, esta Jimmy Werleman kende ta anota un hoya di gol, ora cu tras di e area penal e ta contra e bala cu un tiro durismo den skina drechi pa e 2 - 1 pa Sportboys. Un wega limpi cu un carchi gel so durante henter e partido, awo Sportboys ta hala rosea comodamente, mientras Riverplate a hinca su mes den un problema grave cu e derota aki y mester bai pensa bon si nan kier mantene nan mes den e Division aki. E refree principal di e anochi tabata Oshi Kock asisti pa Jason Colina y Frans Dijkhoff na mesa Ismael Matos.