Dialuna anochi a tuma lugar e enteresante entre Sport Boys di Angochi contra e amarillonan di Dakota. E wega a cuminsa cu 20 minut di retraso pasobra tabata tin un malcomunicasion entre e refreenan.
E wega cu pa Dakota tabata uno crucial, un victoria lo saca nan for di den sotano y pa Sport Boys tabata nifica casi un siguransa di permanese den division honor. Tur dos equipo a cuminsa den e di dos buelta cu un derota, e amariyonan di Dakota comandando e di 9 lugar cu 8 punto, mientras cu e equipo di Sportboys ta na di 6 lugar cu 12 punto. Den e plantela di Dakota nos por a mira tur e cuater adkisionnan hulandes, cu Koen y Niek den defensa y Ridderbos den medio campo, den e delanteria nos por a mira Ignacio cu Williams. Di otro banda nos por a mira un Sportboys cu plantela completo, cu Garichi Werleman den atake.
E wega mes a cuminsa 20 minut lat debi cu no tabatin arbitro, despues a pidi disculpa pa nan debi na compromiso di trabou. Den e minutnan inicial nos por a mira un Dakota un poco mas mihor ariba tereno, controlando e partido y creando peliger dor di ataca bon y forma peliger pa e porteria defendi pa Jorick Mackay. Na di 6min, e bolante di Dakota, Wiersma ta tira e prome bala ariba gol pero su tiro ta sali desvia na banda. Na di 14min, Dakota ta bolbe haya un otro oportunidad, e biaha aki Ignacio ta lora un bunita bala aki Ridderbos inexplicablemente ta hera esaki ni un meter for di e gol. Na di 20min, tras di un tremendo pase di Robert pa Dwight kende ta pone den teblachi pa Ignacio, pero Markwin ta tarda un mundo pa tira ariba gol, un otro oportunidad pa Dakota ta bai perdi.
 Mester bisa cu den e prome mei ora di wega tur cos tabata Dakota, atacando bon, dominando e medio campo por completo, pero e gol tabata falta, di otro banda Sportboys a yega dos biaha so dilanti di gol di Dakota esaki pa medio di un freekick, pero e bala ehecuta pa Garichi ta dal den barera, mientras Jimmy ta hera un cabezaso dilanti gol por completo. Remarcabel ta cu e hoben Geerman den e medio campo di Sportboys ta bon, pero e no ta haya e respaldo nesecario di su companeronan cu ta cai demasiado atras, asina persion ta ser crea ariba e defensa, e delanteronan Wever y Werleman ta lucha nan so dilanti. Na di 35min, e defensa di Dakota, Koen ta lora un bala dilanti gol aki Dwight ta pone pia na e bala pero mucho poco poco den man di portero Mackay. Dos minut despues tabata Ignacio kende ta tira duro, pero portero Mackay ta luci y ta saca e bala manda pafor. Mester bisa cu portero Karsban di Dakota pa varios rato no a haya bala. Un prome tempo cu Dakota tocando bon, dominando tur tereno, pero no ta probecha di e oportunidadnan crea.
Den e di dos tempo, Sportboys a sali mas den atake, cu Junior Rasmijn drentando bon y yuda su equipo na unda e ta pone mas stabilidad, sigur den e medio campo. Den un par di minut Sportboys a haya algun bon oportunidad, pero nan ta desperdicia tur, pues un bon chens di habri e marcador. Di otro banda mester bisa cu Dakota no a luci manera debe ser, nan bolantenan a cai atras cu consecuencia cu e delanteronan no tabata haya e bala manera debe ser, kizas e aspecto di condicion a hunga un rol importante. Un cabesazo na di 83min di Koen tabata e unico oportunidad pa Dakota.
Den pito, Sportboys ta haya un bon oportunidad, pero e hungador ta tira halto y pafor. Mucho mas no a pasa den e wega aki, un empate cu no ta combini Dakota, mirando cu nan a bai pa 9 punto, otro siman nan lo mester enfrenta Brazil Jrs y despues di eynan ta equiponan fuerte so nan lo keda topa te dia campeonato caba, Sportboys a bai 13 punto y lo mester keda lucha fuerte pa keda den division di honor. |