Diamars anochi tabata tin continuasion di campeonato segunda buelta ora cu SV Britannia e actual campeonnan di Aruba y tambe campeon di "Copa Betico" a enfrenta La Fama. Manera menciona e wega tabata bastante for di balansa y un La Fama bastante bruto den e prome tempo. La Fama kendenan a bini y busca revancha despues di e derota siman pasa den e final di Copa Betico 2010.

E wega aki tabata uno valido pa e di segundo buelta, mirando cu tur equipo ya a hunga nan promer wega caba. Mester bisa cu den e alineacion di SV Britannia nos a haya falta di e medio campista Thode, kende ta lesiona y den La Fama por a mira un Rodriguez pafor di e alineacion, pero si e biaha aki por a conta cu e defensornan Gijsbertha y Engelbrecht como tambe Bundell den reserva. Den e minutnan inicial di e partido nos por a nota cu e wega a ser para un rato, pa motibo cu e balanan di futbol tabata falta aire, kizas e refereenan no a nota esaki, un otro biaha ta bon pa wak esakinan bon, ta cosnan cu no mag di pasa.
Potret by; "Antonio Carlo" Den e minutnan inicial ambos equipo a sali brabo, lansando atakenan di rapidez, ya na di 2 minut, Chando de Lange ta bai laga Engelbrecht na linea, ta cruz bon pero e e bala no ta yega na Jonathan dor di un linea di defensa atento kende ta anticipa e paso. Di otro banda La Fama tampoco no a keda atras, paso dos minut despues tabata Loduwika kende ta tira lastra, pero ta mira su bala pasa na banda di gol. Sinembargo na di 6 minut  di e partido e savaneteronan di La Fama ta bai ariba 1 - 0, ora cu Rigmar Loduwika ta haya un bala largo for di e defensa Werleman, aki e linea di defensa di Britannia ta kibra nan propio trampa di offside, Loduwika lihe manera semper ta piki e bala, avanza cu esaki direccion di gol, djey e ta kita e portero David Lacle di Britannia for di su curpa y deposita e bala den gol bashi.
Potret saca pa "Antonio Carlo" Remarcabel ta cu ora Britannia bai den atake cu hopi hende tras di e bala y nan perde esaki, La Fama ta lanza su contra atakenan peligroso cu Yuwana y Loduwika liher dilanti, e hugadanan di offside no ta tur ora tabata funciona cerca Britannia, na dos ocasion e defensa central Calucho Geerman ta keda colga patras. Na di 17 min, Marlon Andrea ta tira un bala durisimo ariba portero Jeffrey Werleman kende ta luci tremendo, ta bon pa bisa cu durante di henter e partido Jeffrey Werleman tabata grandi, den casi tur hugada el a luci den gol scapando La Fama di haya varios gol encontra, mescos ta conta tambe pa portero suplente di Britannia, David Lacle. Na di 31 minut, Dedo Lake ta empata e wega 1 - 1, ora cu den un cruse di Junel Sanchez, e alero Andrea ta remata pero Jeffrey ta tapa y aki e bala ta cai ariba pia di Dedo kende no ta basila y schuif cos den net.
Potret saca pa "Antonio Carlo".
Den e prome tempo tabatin critica fuerte ariba e arbitrahe di e anochi aki cu ta di sr. Ale Quintero, pa motibo di no fluit consistente e hungadornan a cuminsa hunga duro y te hasta trata scop otro den e forma di lesiona otro, hopi reclamo constante di parti di e hungadornan ariba e arbitro, mas e wega ta sigui mas e temperamento tabata subi. Dado momento tabatin partimento di carchi pa loco y e wega tabata mas para cu nunca. Hasta dos carchi cora a ser duna na hungadornan di reserva cu tabata ariba banki di La Fama, tanto Almanzo Bundell y portero Ras mester a bandona e partido. Net prome cu halftime, Lio Tromp ta haya e oportunidad clave pa manda La Fama ariba, pero su tiro ta mucho halto.
Den e prome minut di e segundo tempo, e defensa di Britannia, Donata casi ta manda su equipo ariba ora cu despues di un par di bon combinacion e ta haye su so cu Jeffrey, pero un bez e portero ta luci y tapa bon. E segundo tempo tabata concentra su mes hopi den e medio campo, cu hopi hugada coritico y desde aki trata haci hugadanan sorpresivo y yega na gol di otro. Tanto La Fama y Britannia ta haya oportunidad, pero Schwengle di La Fama y Andrea di Britannia ta hera oportunidadnan cu etiketa di gol. Den e ultimo minut di wega Lio Tromp por a bira e heroe pa e savaneteronan di La Fama, pero di un distancia cerca e ta hera cu un tiro halto. Mester bisa cu Jonathan Lake di Britannia y Silvester Schwengle di La Fama no tabata bon den e wega durante henter e partido, esaki bo ta ripara cu dilanti cosnan no tabata cana manera debe ser, esakinan ta hungadornan clave y cu por haci diferencia di biaha den un partido. Cu e empate aki La Fama ta empata cu RCA na prome lugar cu 21 punto, aunke cu ayera RCA a enfrenta Nacional, Britannia ta keda na di tercer lugar cu 19 punto.
Photo by; Antonio Carlo. La Fama ta bai ariba cu gol di Lodewica mientras cu SV Britannia ta empata pa medio di Gregory "Dedo" Lake. Den final e wega a bira bastante mas bruto y unda cu Igmard Gijsbertha ta tumba Ulises Nuñez den area penal pero refree no a wak e hungada pa pinalty. Casi na final di wega dos hungador di La Fama ta hanja carchi corra door di a insulta e refreenan. Asina tambe e wega ta bin caba cu score di 1-1.